،، مولد ،،/أحلام المصري

،، مولد ،،

املا سطورك و لوّن ياللا
اكتب..ارسم..كله على الله
اوعى ف مرة تنسى اللازمة
تبقى كتابتك و لا ليها لازمة
ياللا يا شاعر...ياللا يا كاتب
املا و زيّن نفس القالب..
خلّي الخايب يبقى امام
خلّي الصادق يبقى الكاذب
و الْحَق ركّب دقن و عِمّة
أصلها زايطة...هيصة و لمّة
عصر القرش و الدينار
عصر السبع يخاف صرصار
اجمع و اقسم ع الشطار
و اطرح و اضرب قلب الأمة
ارمي بياضك بس بـ كلمة
تشعلل نار قلب الأزمة
ياللا بـ سرعة يا شاطر ياللا
الحق درورك...اعمل همّة
تورتة كبيرة...تحب اللّمة
اوعى يا واد ألاقيك محتار
دا انت ربيع الحرف الذهبي
دا انت بقيت فينا المختار
لمّع حرفك...و ابري سنانك..
و ادبح ياللا ...وقت استنفار




مهداة إلى كل من يخون القلم...

المواضيع المتشابهه:

• ،، قلبي لما يتكلم // أحلام المصري ،،
• ،، عبثُ الحلم! // أحلام المصري ،،
• ،، دموعُ شجرة // أحلام المصري ،،
• ،، استفاقة // أحلام المصري ،،
• ،، الفراشات المهاجرة// أحلام المصري ،،